ភ្នំពេញ៖ ស្ថានទូតអូស្ត្រាលីប្រចាំកម្ពុជាបានរៀបចំពិធីបង្ហូតលើកទង់ជាតិជាពិសេសនៅព្រឹកថ្ងៃទី១ ខែមិថុនា ដើម្បីអបអរសប្តាហ៍នៃការផ្សះផ្សាជាតិអូស្ត្រាលីដែលធ្វើឡើងនៅថ្ងៃទី២៧ ខែឧសភា រហូតដល់ថ្ងៃទី៣ ខែមិថុនា។
ស្ថានទូតអូស្ត្រាលីបានឱ្យដឹងថា សប្តាហ៍នៃការផ្សះផ្សាជាតិ គឺជាពេលវេលានៃការចែករំលែកប្រវត្តិសាស្រ្ត វប្បធម៌ និងសមិទ្ធិផលនានារបស់អូស្រ្តាលី និងដើម្បីស្វែងយល់នូវអ្វីដែលអូស្ត្រាលីអាចរួមចំណែកដល់ការសម្រេចបាននូវការផ្សះផ្សាជាតិ។
ស្ថានទូតបញ្ជាក់ថា៖ «របៀបវារៈការទូតជនជាតិដើមភាគតិចរបស់យើង មានគោលបំណងលើកកំពស់បញ្ហាជនជាតិដើមភាគតិចនៅក្នុងកិច្ចការបរទេស និងការងារអភិវឌ្ឍន៍របស់យើង។ វាត្រូវបានបង្កើតឡើងដោយការប្តេជ្ញាចិត្តរបស់រដ្ឋាភិបាលអូស្ត្រាលី ក្នុងការសហការជាមួយជនជាតិដើមភាគតិចអូស្ត្រាលី។ វាជាគោលនយោបាយនៃការផ្សះផ្សាជាតិក្នុងប្រទេសអូស្ត្រាលី និងការគាំទ្រសិទ្ធិជនជាតិដើមភាគតិចជុំវិញពិភពលោក»។
ប្រធានបទសំរាប់សប្តាហ៍នៃការផ្សះផ្សាជាតិឆ្នាំនេះគឺ «ក្លាហាន ហ៊ានធ្វើការផ្លាស់ប្តូរ» គឺជាបញ្ហាប្រឈមមួយសម្រាប់យើងទាំងអស់គ្នា ក្លាហាន និងដោះស្រាយបញ្ហាមិនទាន់ចប់នៃការផ្សះផ្សាដូច្នេះយើងអាចធ្វើការផ្លាស់ប្តូរដើម្បីយើងទាំងអស់គ្នា៕
